*ماذا نعني بنواقض الإسلام ؟
- جواب هذا السؤال له مقدمة محتاجين نفهمها و هي :
كل مسلم و مسلمة مرتبطين بعقد مع الله سبحانه ، هذا العقد اسمه : عقد الإسلام ، عقد الإسلام كما قلت هو ارتباط بين :
1- رب العالمين سبحانه .
2- المسلم أو المسلمة .
طيب : عقد الإسلام عبارة عن إيه ؟ شوف : عبارة عن التزام منك كمسلم بثلاثة أمور :
1- أن تشهد بلسانك أنه : لا إله إلا الله محمد رسول الله..
2- تلتزم بشعائر الإسلام ، يعني : الصلاة و الصيام و الزكاة والحج مع القدرة ، أو باختصار : أركان الإسلام ..
3- ألا تقع في شئ ينقض و يهدم هذا العقد الوثيق الذي بينك وبين ربك سبحانه ، إزاي ؟ مثلا : فلان يشهد أنه لا إله إلا الله محمد رسول الله ، و يصلي و يصوم و يحج و يتصدق، وبعدين :
رجع بيته و حصل مشكلة مع زوجته ، و الأصوات ارتفعت و فجأة : راح سب الدين !! ليه يا فلان تسب الدين ؟! يقلك : كنت متعصب و غضبان ، أصل ملقتش الأكل معمول ؟!!!
هذا الرجل ماذا فعل ؟ فعل شئ جعل عقد الإسلام مع الله :
لاغيا ، باطلا ، فاسدا ، إزاي : مبقاش مسلم ؟!! ليه ؟ عشان احنا قلنا : من شروط صحة عقد الإسلام ألا نرتكب شيء يبطله و يهدمه ، طيب : الراجل بيقول : لا إله إلا الله محمد رسول
الله ، و بيصلي و لسة راجع من الحج ؟ لالا ، مش هينفعه كل دا ،عارف الراجل دا عمل زي مين ؟ هقلك : رجل توضأ و دخل الصلاة ، و هو في التشهد الأخير خرج منه ريح ، حكم صلاته إيش ؟ باطلة بإجماع المسلمين ، إزاي ؟ دا اتوضأ ؟ و قال : الله اكبر ، وركع و سجد و سبح ربنا !! ماشي : بس خرج ريح ، صلاته لاغي ، هو دا بالضط زي اللي سب الدين ، إسلامه لاغي باطل ....
طيب : يعني إيه نواقض الإسلام ؟ هقلك : يعني أمور لو عملناها خرجنا من الإسلام و مبقناش مسلمين ، إمال نبقى إيه ؟ مرتدين كفار ، يا ستير !! والله هو كدا ، طيب :
دا كلام مين ؟ داعش ؟ ولا الجماعات الإسلامية ؟ لا و الله ، دا كلام ربنا سبحانه و سيدنا محمد عليه الصلاة و السلام ، تمام يا أستاذي ، طالما كلام ربنا سبحانه و كلام حبيبنا محمد ،كدا موافق جدااا ...